واشنگٹن: امریکہ کے یومِ آزادی اور ملک کے ڈھائی سو سالہ قیام کی تقریبات کے دوران دارالحکومت واشنگٹن ڈی سی میں ایک انتہاپسند اور سفید فام بالادستی کے نظریات سے منسلک گروہ نے مارچ کیا، جس سے شہر میں کشیدگی پیدا ہو گئی۔

رپورٹ کے مطابق درجنوں سے لے کر سینکڑوں تک ماسک پہنے افراد نے بینرز اور کنفیڈریٹ پرچم اٹھا کر شہر کے مختلف حصوں میں مارچ کیا۔ یہ گروہ ریلوے اسٹیشن یونین اسٹیشن کے قریب جمع ہوا اور بعد ازاں کیپیٹل ہل کی طرف پیش قدمی کی۔

مظاہرے کی قیادت مبینہ طور پر تھامس روسو کر رہے تھے، جو ایک انتہاپسند تنظیم کے بانی کے طور پر پہچانے جاتے ہیں۔ شرکا نے “آزادی، حیات اور فتح” اور “امریکہ کو دوبارہ حاصل کرو” جیسے نعرے لگائے۔

عینی شاہدین اور سوشل میڈیا پر گردش کرنے والی ویڈیوز کے مطابق مظاہرین نے سفید ماسک پہن رکھے تھے اور بعض کو واشنگٹن کے میٹرو نظام میں سفر کرتے ہوئے بھی دیکھا گیا، جس پر دیگر مسافروں نے تشویش کا اظہار کیا۔

یہ واقعہ ایک ایسے موقع پر پیش آیا جب ملک بھر میں یومِ آزادی کی تقریبات جاری تھیں، اور اس نے امریکی معاشرے میں سیاسی و نظریاتی تقسیم اور انتہاپسندی کے بڑھتے رجحانات پر نئی بحث چھیڑ دی ہے