پاکستان میں پاسپورٹ گھر پر وصول کرنے کی نئی سہولت کا آغاز، شہریوں کے لیے “پاسپورٹ آپ کی دہلیز پر” سروس متعارف

اسلام آباد: حکومتِ پاکستان نے شہریوں کے لیے سہولت میں اضافہ کرتے ہوئے پاسپورٹ گھر پر ڈیلیور کرنے کی نئی سروس کا آغاز کر دیا ہے، جس کے تحت اب شہری اپنے پاسپورٹ براہِ راست اپنے دیے گئے پتے پر وصول کر سکیں گے۔

ڈائریکٹوریٹ جنرل آف امیگریشن اینڈ پاسپورٹس (ڈی جی آئی پی) نے لاجسٹکس اور کورئیر کمپنی ٹی سی ایس کے ساتھ شراکت داری کے ذریعے یہ نئی سہولت “پاسپورٹ آپ کی دہلیز پر” کے نام سے متعارف کرائی ہے۔

سرکاری اعلامیے کے مطابق اس سروس کا مقصد شہریوں کے لیے سہولت میں اضافہ کرنا اور سرکاری خدمات کی فراہمی کے نظام کو جدید خطوط پر استوار کرنا ہے۔ اس اقدام کے تحت درخواست دہندگان کو پاسپورٹ حاصل کرنے کے لیے دفاتر کے چکر نہیں لگانے پڑیں گے، بلکہ دستاویز ان کے منتخب کردہ پتے پر پہنچا دی جائے گی۔

یہ سروس اسلام آباد میں ڈی جی آئی پی ہیڈکوارٹرز میں منعقدہ ایک اجلاس کے دوران باضابطہ طور پر شروع کی گئی، جہاں متعلقہ حکام نے اس اقدام کو عوامی خدمات میں بہتری کی سمت ایک اہم پیش رفت قرار دیا