ٹیسلا نے چھ نشستوں والی ماڈل وائی ایل متعارف کرا دی، فروخت بڑھانے کی نئی حکمت عملی

واشنگٹن: امریکی برقی گاڑیاں بنانے والی کمپنی ٹیسلا نے اپنی سب سے زیادہ فروخت ہونے والی ایس یو وی ماڈل وائی کا نیا چھ نشستوں والا طویل وہیل بیس ورژن امریکہ میں متعارف کرا دیا ہے، جس کا مقصد کم ہوتی فروخت کو سہارا دینا اور مارکیٹ میں طلب کو دوبارہ بڑھانا ہے۔

کمپنی کے مطابق نئی گاڑی کی ابتدائی قیمت امریکہ میں 61,990 ڈالر مقرر کی گئی ہے۔ ٹیسلا نے یہ بھی اعلان کیا ہے کہ اسی ماڈل کا توسیع شدہ ورژن اب متحدہ عرب امارات میں بھی دستیاب ہے۔

ٹیسلا اس وقت نئی مکمل گاڑیاں متعارف کرانے کے بجائے اپنے موجودہ ماڈلز کی مختلف اقسام پیش کر کے صارفین کو متوجہ کرنے کی حکمت عملی پر عمل کر رہی ہے۔ کمپنی نے گزشتہ برس چین میں بھی اسی طرز کا طویل ورژن متعارف کرایا تھا، جسے ماڈل وائی ایل کا نام دیا گیا، اور وہاں اسے مقامی کمپنیوں خصوصاً بی وائی ڈی کے سخت مقابلے کے باوجود فروخت میں بہتری کے لیے اہم قرار دیا گیا۔

ماہرین کے مطابق عالمی برقی گاڑیوں کی مارکیٹ میں بڑھتے ہوئے مقابلے اور ٹیکس کریڈٹس میں کمی کے بعد ٹیسلا اپنی مصنوعات کی مختلف شکلیں پیش کر کے طلب برقرار رکھنے کی کوشش کر رہی ہے، تاکہ کمپنی کی عالمی فروخت کی رفتار کو سہارا دیا جا سکے