سوڈان کے شہر الابیض میں انسانی المیہ شدت اختیار کر گیا، اقوامِ متحدہ کا فوری عالمی کارروائی کا مطالبہ

جنیوا: اقوامِ متحدہ کے انسانی حقوق کے سربراہ نے خبردار کیا ہے کہ سوڈان کے محصور شہر الابیض اور اس کے گرد و نواح میں ایک نیا اور سنگین انسانی المیہ جنم لے رہا ہے، جہاں شہری آبادی کو مسلسل تشدد، قتل و غارت اور انسانی حقوق کی سنگین خلاف ورزیوں کا سامنا ہے۔

اقوامِ متحدہ کے مطابق الابیض اور اس کے اطراف سے ماورائے عدالت ہلاکتوں، جنسی تشدد اور عام شہریوں کے خلاف منظم حملوں کی اطلاعات موصول ہو رہی ہیں، جو جنگی جرائم کے خدشات کو مزید تقویت دیتی ہیں۔ انسانی حقوق کے سربراہ نے عالمی برادری پر زور دیا کہ وہ مزید تاخیر کے بغیر شہریوں کے تحفظ کے لیے مؤثر اقدامات کرے۔

الابیض، شمالی کردفان صوبے کا دارالحکومت ہے اور گزشتہ چند ہفتوں سے سوڈانی فوج اور نیم فوجی ریپڈ سپورٹ فورسز کے درمیان شدید لڑائی کا مرکز بنا ہوا ہے۔ یہ جنگ تین برس سے جاری ہے اور اس کے نتیجے میں لاکھوں افراد بے گھر جبکہ کروڑوں شہری خوراک، ادویات اور بنیادی سہولتوں کی شدید قلت کا شکار ہیں۔

دوسری جانب سوڈان کے وزیرِ خارجہ نے عالمی برادری سے مطالبہ کیا ہے کہ ریپڈ سپورٹ فورسز کو اسلحے کی فراہمی فوری طور پر روکی جائے تاکہ تنازع مزید نہ بڑھ سکے۔

اقوامِ متحدہ نے خبردار کیا ہے کہ اگر فوری عالمی مداخلت نہ کی گئی تو الابیض میں انسانی بحران مزید گہرا ہو سکتا ہے اور ہزاروں بے گناہ شہری اس کی قیمت چکائیں گے