لاہور: پاکستان انٹرنیشنل ایئرلائنز (پی آئی اے) نے چھ سال کے وقفے کے بعد لاہور اور مانچسٹر کے درمیان براہِ راست پروازیں دوبارہ شروع کر دی ہیں، جس کے ساتھ ہی پنجاب کے دارالحکومت سے پہلی پرواز جمعرات کو روانہ ہوئی۔

ذرائع کے مطابق اس روٹ کی بحالی کو بیرونِ ملک مقیم پاکستانیوں کے لیے ایک اہم پیش رفت قرار دیا جا رہا ہے، خاص طور پر برطانیہ میں بڑی پاکستانی کمیونٹی کے پیش نظر یہ روٹ ہمیشہ سے مصروف ترین بین الاقوامی فضائی راستوں میں شمار ہوتا ہے۔

پروازوں کی معطلی کے بعد مسافروں کو عام طور پر دو یا زیادہ اسٹاپس کے ذریعے سفر کرنا پڑتا تھا، جس سے نہ صرف وقت بڑھتا تھا بلکہ سفری اخراجات بھی زیادہ ہو جاتے تھے۔

پی آئی اے حکام کے مطابق براہِ راست پروازوں کی بحالی سے نہ صرف مسافروں کو سہولت ملے گی بلکہ قومی ایئرلائن کی بین الاقوامی سروسز میں بھی بہتری متوقع ہے۔

یہ اقدام ایسے وقت میں سامنے آیا ہے جب پی آئی اے اپنی بین الاقوامی آپریشنز کو دوبارہ مستحکم کرنے اور اہم روٹس پر سروس بحال کرنے کی کوشش کر رہی ہے