امریکی خلائی فورس کے لیے نجی کمپنیوں کے “خلائی پائلٹس” کا جدید مشن، مدار میں قریبی نگرانی

واشنگٹن: امریکی خلائی فورس نے جاسوسی اور نگرانی کے نئے دور میں نجی کمپنیوں کو شامل کرتے ہوئے ایک ایسا مشن مکمل کرایا ہے جسے ماہرین نے “ٹاپ گن طرز کا خلائی آپریشن” قرار دیا ہے۔

رپورٹ کے مطابق دو نجی خلائی کمپنیوں، راکٹ لیب اور ٹرو اینوملی، نے امریکی خلائی فورس کے لیے ایک انتہائی پیچیدہ مدار ی مشن انجام دیا جس میں دو سیٹلائٹس کو خلا میں ایک دوسرے کے قریب لا کر ان کی قریبی نگرانی کی گئی۔

اس نوعیت کے مشنز میں عام طور پر سیٹلائٹس کو دشمن یا غیر ملکی خلائی آلات کے قریب لے جا کر ان کی صلاحیتوں، حرکت اور تکنیکی خصوصیات کا مشاہدہ کیا جاتا ہے، جو جدید فوجی انٹیلی جنس کا اہم حصہ سمجھا جاتا ہے۔

رپورٹ کے مطابق حالیہ مشن میں دونوں سیٹلائٹس نے مدار میں ایک دوسرے کے قریب آ کر ایسی پوزیشن حاصل کی جہاں سے ایک نے دوسرے کی تصاویر بھی حاصل کیں، جو مستقبل کی خلائی نگرانی کے نئے طریقوں کی جھلک دکھاتا ہے۔

امریکی فوجی حکام کا کہنا ہے کہ خلائی ماحول میں بڑھتی ہوئی سرگرمیوں اور مسابقت کے باعث اب ایسے پیچیدہ مشنز کو صرف سرکاری اداروں تک محدود رکھنے کے بجائے نجی شعبے کے تعاون سے انجام دینا زیادہ مؤثر سمجھا جا رہا ہے۔

ماہرین کے مطابق یہ رجحان اس بات کی علامت ہے کہ مستقبل میں خلائی دفاع اور نگرانی کا بڑا حصہ نجی کمپنیوں کے ہاتھ میں جا سکتا ہے، جہاں عسکری اور تجارتی خلا تیزی سے ایک دوسرے میں مدغم ہو رہے ہیں