مائیکروسافٹ کا 2.5 ارب ڈالر کے ساتھ نئی اے آئی کمپنی قائم کرنے کا اعلان

سیئٹل: امریکی ٹیکنالوجی کمپنی مائیکروسافٹ نے اعلان کیا ہے کہ وہ ایک نئی ذیلی کمپنی قائم کر رہی ہے جو کاروباری اداروں کو مصنوعی ذہانت (اے آئی) کے مؤثر استعمال اور سرمایہ کاری پر بہتر منافع حاصل کرنے میں مدد دے گی۔

رپورٹ کے مطابق اس نئے ادارے کو “مائیکروسافٹ فرنٹیئر کمپنی” کا نام دیا گیا ہے اور ابتدائی مرحلے میں کمپنی خود 2.5 ارب ڈالر کی سرمایہ کاری کرے گی۔ اس اقدام کا مقصد بڑی کمپنیوں کو مختلف اے آئی ٹیکنالوجیز کے انتخاب، انضمام اور استعمال میں رہنمائی فراہم کرنا ہے۔

کمپنی کے مطابق یہ سروس خاص طور پر اُن بڑے کارپوریٹس کے لیے ہوگی جو پہلے صرف ایک ہی اے آئی فراہم کنندہ پر انحصار کرتے تھے، جیسے اوپن اے آئی یا اینتھروپک، لیکن اب وہ مختلف اوپن سورس اور کمرشل ماڈلز کو ملا کر استعمال کر رہے ہیں۔

رپورٹ میں کہا گیا ہے کہ اس بدلتے ہوئے رجحان کی وجہ سے کمپنیوں کو زیادہ اخراجات اور طویل مدت تک سرمایہ کاری پر واپسی کا انتظار کرنا پڑ رہا ہے، اسی لیے مائیکروسافٹ کا نیا منصوبہ کاروباری اداروں کو زیادہ مؤثر حکمتِ عملی اپنانے میں مدد دے گا۔

ماہرین کے مطابق یہ اقدام عالمی سطح پر اے آئی کی دوڑ میں ایک اہم پیش رفت ہے، جہاں بڑی ٹیک کمپنیاں صرف ماڈلز فراہم کرنے کے بجائے مکمل کاروباری حل دینے کی طرف بڑھ رہی ہیں