البرٹا علیحدگی ریفرنڈم: عدالت سے علیحدگی پسند گروپ کو جزوی کامیابی
کینیڈا کے صوبہ البرٹا میں علیحدگی کے حق میں مہم چلانے والے گروپ اسٹے فری البرٹا کو عدالت سے جزوی کامیابی مل گئی ہے۔ عدالت نے حکم دیا ہے کہ الیکشنز البرٹا ریفرنڈم کی درخواست کے لیے جمع کرائے گئے دستخطوں کی جانچ اور تصدیق کا عمل جاری رکھ سکتی ہے، تاہم مقدمے کے دیگر آئینی اور قانونی نکات پر عدالتی کارروائی بدستور جاری رہے گی۔
عدالت کے اس فیصلے کے بعد دستخطوں کی گنتی اور تصدیق شروع ہوگی، جس سے یہ واضح ہو سکے گا کہ درخواست مطلوبہ قانونی حد پوری کرتی ہے یا نہیں۔ تاہم اس فیصلے کا یہ مطلب نہیں کہ ریفرنڈم خود بخود منعقد ہوگا، کیونکہ اس کے لیے مزید قانونی اور آئینی مراحل ابھی باقی ہیں۔

دوسری جانب، علیحدگی کے مخالف حلقوں اور متعدد مقامی فرسٹ نیشنز نے اس عمل پر تحفظات کا اظہار کیا ہے۔ ان کا مؤقف ہے کہ البرٹا کی علیحدگی کا معاملہ نہ صرف آئینی پیچیدگیوں بلکہ معاہداتی حقوق سے بھی جڑا ہوا ہے، اس لیے حتمی فیصلہ مزید عدالتی کارروائی اور حکومتی اقدامات کے بعد ہی ممکن ہوگا۔