بھارت : تین سالہ بچی کے بہیمانہ قتل پر 65 سالہ مجرم کو سزائے موت، عدالت نے 60 روز میں سنایا فیصلہ

بھارت کی ریاست مہاراشٹر کے شہر پونے کی ایک خصوصی عدالت نے تین سالہ بچی کے اغوا، جنسی تشدد اور قتل کے مقدمے میں 65 سالہ ملزم کو سزائے موت سنا دی ہے۔ عدالت نے یہ فیصلہ وقوعے کے صرف 60 روز کے اندر سنایا، جسے تیز رفتار عدالتی کارروائی کی ایک اہم مثال قرار دیا جا رہا ہے۔

میڈیا رپورٹس کے مطابق یہ افسوسناک واقعہ یکم مئی 2026 کو ناسراپور گاؤں میں پیش آیا، جہاں ملزم مبینہ طور پر بچی کو بہلا پھسلا کر ایک مویشیوں کے باڑے میں لے گیا۔ بعد ازاں بچی کی لاش برآمد ہوئی، جس کے بعد پولیس نے فوری کارروائی کرتے ہوئے ملزم کو گرفتار کر لیا۔

تفتیش کے دوران جمع کیے گئے شواہد اور استغاثہ کے دلائل کی بنیاد پر عدالت نے ملزم کو قصوروار قرار دیتے ہوئے سزائے موت سنائی۔ فیصلے میں عدالت نے قرار دیا کہ یہ جرم غیر معمولی سنگینی کا حامل ہے اور اس نے معاشرے کے اجتماعی ضمیر کو جھنجھوڑ کر رکھ دیا۔

بھارتی قانون کے مطابق اس فیصلے پر عمل درآمد سے قبل ملزم کو اعلیٰ عدالتوں میں اپیل کا حق حاصل ہوگا