سیاسی سرپرستی یافتہ سرمایہ کاری معیشت میں توازن کو متاثر کر رہی ہے: کانگریس کا دعویٰ

نئی دہلی: بھارت کی اپوزیشن جماعت کانگریس نے ملک میں نجی کارپوریٹ سرمایہ کاری کی سست رفتاری کو معیشت کا سب سے بڑا چیلنج قرار دیتے ہوئے کہا ہے کہ سرمایہ کاری میں عدم توازن اور معاشی طاقت کی بڑھتی ہوئی مرکزیت ترقی کی رفتار کو متاثر کر رہی ہے۔

کانگریس کے سینئر رہنما اور جنرل سیکرٹری جے رام رمیش نے مؤقف اختیار کیا ہے کہ اب صورتحال یہ بنتی جا رہی ہے کہ سیاسی سرپرستی میں ہونے والی نجی سرمایہ کاری وسیع اور متنوع سرمایہ کاری کے مواقع کو محدود کر رہی ہے۔

انہوں نے کہا کہ اگر سرمایہ کاری چند مخصوص حلقوں تک محدود ہو جائے تو اس سے مجموعی معاشی ترقی اور روزگار کے مواقع پر منفی اثر پڑتا ہے۔ ان کے مطابق بھارت کو اس وقت سب سے بڑا مسئلہ یہی درپیش ہے کہ نجی شعبے میں عمومی سطح پر سرمایہ کاری کی رفتار کمزور ہے۔

کانگریس کا کہنا ہے کہ معاشی طاقت کے ارتکاز میں اضافہ نئے سرمایہ کاروں کے لیے رکاوٹیں پیدا کر رہا ہے، جس کے نتیجے میں وسیع البنیاد معاشی ترقی متاثر ہو رہی ہے۔

حکومتی پالیسیوں پر تنقید کرتے ہوئے اپوزیشن جماعت نے مطالبہ کیا ہے کہ سرمایہ کاری کے ماحول کو زیادہ شفاف اور مسابقتی بنایا جائے تاکہ تمام شعبوں اور طبقات کو یکساں مواقع حاصل ہو سکیں