پاکستان تحریکِ انصاف نے عمران خان کی عدالتوں کے ذریعے رہائی کے کسی امکان سے مایوس ہوکر ایک بار پھر عوام سے بڑے پیمانے پر سڑکوں پر آنے کی اپیل کی ہے۔ اس مہم کے دوران پارٹی کی جانب سے اپنے رہنماؤں پر مشتمل ایسی ویڈیوز جاری کی گئی ہیں، جن میں تحریکی رہنما عوام کو یہ سمجھاتے نظر آتے ہیں کہ نظام کی تبدیلی اور عمران خان کی رہائی کے لیے سڑکوں پر آنا ہی واحد راستہ ہے۔ تحریکِ انصاف ان ویڈیوز کے ساتھ ساتھ اپنے کارکنوں، بالخصوص خواتین، نوجوان لڑکیوں اور بچوں سے بھی ویڈیوز بنوا کر سوشل میڈیا پر بڑے پیمانے پر اپلوڈ کر رہی ہے، جن میں یہ افراد حکومت کے ساتھ ساتھ فوج، بیوروکریسی کی اہلیت، ان کی کارکردگی اور سیاسی ایجنڈے کو شدید تنقید کا نشانہ بناتے نظر آتے ہیں۔