امریکی یومِ آزادی سے قبل ٹرمپ کی 11 افراد کو معافی، ماحولیاتی قوانین کی خلاف ورزی کے مقدمات بھی شامل

واشنگٹن: امریکی صدر ڈونلڈ ٹرمپ نے یومِ آزادی کی تقریبات سے ایک روز قبل 11 افراد کو صدارتی معافی دے دی ہے، جن میں دو افراد فراڈ کے مقدمات میں سزا یافتہ تھے جبکہ نو افراد پر ماحولیاتی قوانین کی خلاف ورزی کے الزامات تھے۔

رپورٹ کے مطابق ان نو افراد پر الزام تھا کہ انہوں نے ٹرکوں کے اخراجِ گیس کے نظام میں تبدیلی کر کے وفاقی قانون کلین ایئر ایکٹ کی خلاف ورزی کی۔ یہ مقدمات ماحولیاتی تحفظ سے متعلق امریکی قوانین کے تحت درج کیے گئے تھے۔

یہ معافیاں ایک ایسے وقت میں سامنے آئی ہیں جب امریکہ میں شدید گرمی کی لہر جاری ہے، جسے ماہرین جزوی طور پر ماحولیاتی تبدیلی اور گرین ہاؤس گیسوں کے اثرات سے بھی جوڑ رہے ہیں۔

صدارتی دفتر کے مطابق یہ اقدامات ٹرمپ کی دوسری مدتِ صدارت کے دوران جاری وسیع تر معافیوں کی پالیسی کا حصہ ہیں، جس میں وہ ایسے افراد کو بھی ریلیف دیتے رہے ہیں جنہیں وہ اپنے سیاسی یا نظریاتی حلقے سے قریب سمجھتے ہیں۔

یہ فیصلہ ایک بار پھر امریکہ میں صدارتی اختیارات، ماحولیاتی قوانین کے نفاذ اور سیاسی بنیادوں پر معافی دینے کے رجحان پر نئی بحث کا باعث بن گیا ہے