ڈی ہائیڈریشن: جسم پر خاموش مگر سنگین اثرات — ماہرین نے خطرناک پہلوؤں سے خبردار کر دیا
ماہرینِ صحت کے مطابق پانی کی کمی (ڈی ہائیڈریشن) صرف پیاس لگنے تک محدود مسئلہ نہیں بلکہ یہ جسم کے اندر کئی خاموش تبدیلیاں پیدا کرتی ہے۔
تحقیقی رپورٹس میں بتایا گیا ہے کہ جب جسم میں پانی کی مقدار کم ہو جائے تو خلیے سکڑنا شروع ہو جاتے ہیں، جس سے ان کی کارکردگی متاثر ہوتی ہے۔ اسی طرح گردے پانی بچانے کی کوشش کرتے ہیں، جس کے نتیجے میں پیشاب کا رنگ گہرا ہو جاتا ہے۔
ماہرین کا کہنا ہے کہ یہ ایک عام مگر نظر انداز کیا جانے والا مسئلہ ہے۔ امریکا میں کی گئی ایک تحقیق کے مطابق تقریباً 24 فیصد بڑی عمر کے افراد کسی نہ کسی حد تک ڈی ہائیڈریشن کا شکار ہوتے ہیں۔
صحت کے ماہرین یہ بھی واضح کرتے ہیں کہ “دن میں آٹھ گلاس پانی” کا اصول سائنسی طور پر ہر فرد کے لیے حتمی نہیں، تاہم عام بالغ افراد کے لیے روزانہ تقریباً ایک لیٹر پانی بنیادی ضرورت کے طور پر تجویز کیا جاتا ہے، جو جسمانی حالت اور سرگرمی کے مطابق بڑھ بھی سکتا ہے۔