واشنگٹن: امریکی خلائی ادارے کے حالیہ مشن کے بعد چاند پر انسانوں کی واپسی ایک بار پھر عالمی بحث کا مرکز بن گئی ہے۔ بظاہر اسے سائنسی تحقیق اور خلا میں نئی دریافتوں کی کوشش قرار دیا جا رہا ہے، تاہم ماہرین کے مطابق اس کے پیچھے ایک وسیع تر اسٹریٹجک اور معاشی منصوبہ کارفرما ہے۔ رپورٹس کے مطابق چاند پر مستقل بنیادوں پر قیام، پانی اور برفانی ذخائر سے ایندھن بنانے کی صلاحیت اور مستقبل میں مریخ تک مشنز کی تیاری اس منصوبے کے اہم اہداف ہیں۔ اسی طرح عالمی طاقتوں کے درمیان بڑھتی ہوئی خلائی برتری کی دوڑ بھی اس فیصلے کی بڑی وجہ قرار دی جا رہی ہے۔ ماہرین کا کہنا ہے کہ یہ صرف ایک سائنسی مشن نہیں بلکہ خلا میں مستقبل کی معیشت اور طاقت کے توازن کی بنیاد رکھنے کی کوشش ہے، جس میں نجی کمپنیاں بھی بھرپور کردار ادا کر رہی ہیں۔ یوں چاند پر واپسی کو محض ایک تاریخی یا سائنسی قدم نہیں بلکہ آنے والی دہائیوں کی عالمی حکمت عملی کا مرکزی حصہ سمجھا جا رہا ہے