واشنگٹن کے کارخانے میں سانحہ: کیمیکل ٹینک دھماکے کے بعد لاشیں برآمد، ہلاکتیں گیارہ تک پہنچ گئیں۔ امریکی ریاست واشنگٹن میں لانگ ویو کے ایک کاغذی کارخانے میں کیمیکل ٹینک کے پھٹنے اور تباہی کے واقعے کے بعد جاری تلاش اور امدادی کارروائیوں میں اب تک نو لاپتہ افراد میں سے چھ کی لاشیں برآمد کر لی گئی ہیں جبکہ مزید تین افراد کی تلاش جاری ہے۔ حکام کے مطابق اس حادثے میں مجموعی طور پر ہلاکتوں کی تعداد گیارہ تک پہنچ چکی ہے۔ حکام کا کہنا ہے کہ واقعے کے بعد متاثرہ علاقے میں زہریلے کیمیکل اور آلودہ پانی کو کم کرنے کے لیے ہنگامی اقدامات کیے جا رہے ہیں تاکہ مزید نقصان سے بچا جا سکے۔ امدادی ٹیمیں انتہائی احتیاط کے ساتھ کام کر رہی ہیں کیونکہ علاقے میں کیمیائی آلودگی اب بھی خطرناک سطح پر موجود ہے۔ فائر ڈیپارٹمنٹ کے مطابق ریسکیو آپریشن کے دوران ہر مرحلے پر عملے کی حفاظت کو اولین ترجیح دی جا رہی ہے جبکہ لاشوں کو برآمد کرنے کے بعد انہیں مخصوص طریقہ کار کے تحت صاف کر کے شناخت کے لیے متعلقہ دفتر منتقل کیا جا رہا ہے۔ حکام کا کہنا ہے کہ واقعے کی وجوہات کی تحقیقات جاری ہیں تاہم ابتدائی طور پر اسے ایک صنعتی حادثہ قرار دیا جا رہا ہے جس نے علاقے میں شدید خوف اور تباہی کی صورتحال پیدا کر دی ہے۔