عراق کی فضاؤں میں المناک حادثہ، ایران جنگ کے دوران امریکی خاتون فوجی ہلاک ایران جنگ کے ابتدائی دنوں میں مشرقِ وسطیٰ کی فضاؤں میں جاری شدید فوجی سرگرمیوں کے دوران عراق کے اوپر دو امریکی ری فیولنگ طیاروں کے درمیان فضائی تصادم میں امریکی فضائیہ کی ٹیکنیکل سارجنٹ ایشلے پروئٹ ہلاک ہوگئیں۔ 34 سالہ ایشلے پروئٹ امریکی فضائیہ کے KC-135 ٹینکر طیارے کے عملے کا حصہ تھیں اور انہیں اپنی ذمہ داریوں سے غیر معمولی لگاؤ تھا۔ امریکی اخبار کے مطابق ایشلے کے شوہر گریگ پروئٹ نے بتایا کہ ان کی اہلیہ مشکل حالات میں کام کرنا پسند کرتی تھیں اور ہمیشہ خود کو عملے کا مضبوط ترین رکن ثابت کرنے کی کوشش کرتی تھیں۔ گریگ نے اپنی اہلیہ کی یاد میں ان تصاویر کا بھی ذکر کیا جو 2023 میں اوکلاہوما کے الٹس ایئر فورس بیس پر ایک خصوصی فیملی فوٹو شوٹ کے دوران بنائی گئی تھیں، جہاں دونوں کی محبت پروان چڑھی تھی۔ رپورٹ کے مطابق ایران جنگ کے دوران مشرقِ وسطیٰ میں امریکی اور اتحادی فضائی آپریشنز میں غیر معمولی اضافہ ہوا، جس کے باعث فضائی حدود انتہائی مصروف ہوچکی تھیں۔ اسی تناظر میں پیش آنے والا یہ حادثہ امریکی فوج کے لیے ایک بڑا صدمہ قرار دیا جا رہا ہے۔ ایشلے پروئٹ کی ہلاکت کو ان بڑھتی ہوئی خواتین فوجیوں کی قربانیوں کی علامت قرار دیا جا رہا ہے جو اب محاذ سے جڑی خطرناک عسکری ذمہ داریوں میں بھی نمایاں کردار ادا کر رہی ہیں