سٹیٹن آئی لینڈ شپ یارڈ میں خوفناک دھماکہ اور آگ، ایک شخص ہلاک، درجنوں فائر فائٹرز زخمی۔ نیویارک کے سٹیٹن آئی لینڈ میں واقع ایک شپ یارڈ میں آگ لگنے اور اس کے بعد ہونے والے دو بڑے دھماکوں کے نتیجے میں ایک شخص ہلاک اور تقریباً 34 ریسکیو اہلکار زخمی ہو گئے۔ یہ واقعہ ریچمنڈ ٹیرس کے علاقے میں پیش آیا، جہاں دوپہر کے وقت اطلاع ملی کہ ایک صنعتی عمارت میں آگ لگی ہوئی ہے اور کچھ مزدور اندر پھنسے ہوئے ہیں۔ ریسکیو ٹیمیں فوری طور پر موقع پر پہنچیں اور امدادی کارروائیاں شروع کر دیں۔ حکام کے مطابق جب فائر فائٹرز عمارت کے اندر پھنسے ہوئے افراد کو نکالنے کی کوشش کر رہے تھے تو تقریباً ایک گھنٹے کے اندر اچانک پہلا بڑا دھماکہ ہو گیا۔ اس کے کچھ دیر بعد دوسرا زوردار دھماکہ ہوا جس نے پورے علاقے کو ہلا کر رکھ دیا۔ فائر ڈیپارٹمنٹ کے مطابق دوسرے دھماکے کے وقت بھی ریسکیو اہلکار عمارت کے اندر موجود تھے، جس کی وجہ سے زخمیوں کی تعداد تیزی سے بڑھ گئی۔ زخمی ہونے والوں میں فائر فائٹرز اور فائر مارشل سمیت مختلف اہلکار شامل ہیں، جن میں سے بعض کی حالت تشویشناک بتائی جا رہی ہے۔ ابتدائی معلومات کے مطابق آگ ایک بند صنعتی حصے میں لگی تھی، جو تیزی سے پھیلتی گئی اور بعد میں دھماکوں کی شکل اختیار کر گئی۔ حکام نے علاقے کو گھیرے میں لے کر مکمل طور پر سیل کر دیا ہے اور واقعے کی وجوہات جاننے کے لیے تحقیقات شروع کر دی گئی ہیں۔ مقامی انتظامیہ کا کہنا ہے کہ یہ ایک پیچیدہ صنعتی حادثہ ہے، کیونکہ شپ یارڈ میں بھاری مشینری، دھات کے ڈھانچے اور مختلف خطرناک مواد موجود ہوتے ہیں، جس کی وجہ سے آگ پر قابو پانا مشکل ہو جاتا ہے۔ ریسکیو کارروائیاں مکمل ہونے کے بعد مزید تفصیلات سامنے آنے کی توقع ہے۔