ایک حالیہ رپورٹ میں کہا گیا ہے کہ دنیا اس وقت توانائی کے بحران اور موسمیاتی تبدیلی جیسے دو بڑے چیلنجز کا بیک وقت سامنا کر رہی ہے، جس نے عالمی معیشت اور صنعتی نظام پر دباؤ بڑھا دیا ہے۔ رپورٹ کے مطابق خوش آئند بات یہ ہے کہ انہی بحرانوں نے ایک بڑی تبدیلی کو بھی جنم دیا ہے، خاص طور پر سٹیل کی صنعت میں، جو دنیا بھر میں کاربن ڈائی آکسائیڈ کے اخراج کا ایک بڑا ذریعہ سمجھی جاتی ہے۔ اعداد و شمار کے مطابق سٹیل سازی عالمی سطح پر تقریباً سات سے نو فیصد کاربن اخراج کی ذمہ دار ہے، جس کی وجہ سے اسے ماحول کے لیے انتہائی اہم شعبہ قرار دیا جاتا ہے۔ رپورٹ میں بتایا گیا ہے کہ اس شعبے میں نئی ٹیکنالوجیز تیزی سے سامنے آ رہی ہیں، جن میں سویڈن میں تیار ہونے والی ایک جدید ٹیکنالوجی کو خاص طور پر نمایاں پیش رفت قرار دیا جا رہا ہے۔ ماہرین کے مطابق اگر یہ تبدیلی بڑے پیمانے پر نافذ ہو گئی تو نہ صرف صنعتی آلودگی میں کمی ممکن ہے بلکہ توانائی کے بحران پر قابو پانے میں بھی مدد مل سکتی ہے۔