امریکی سینیٹر برنی سینڈرز نے خبردار کیا ہے کہ مصنوعی ذہانت (AI) اور روبوٹکس اگر صرف ارب پتیوں کے منافع کے لیے استعمال کیے گئے تو یہ نہ صرف لاکھوں ملازمتیں ختم کر سکتے ہیں بلکہ معاشی عدم مساوات اور سماجی مسائل کو بھی بڑھا سکتے ہیں۔ مائن ریاست میں “فائٹ اولیگارکی” ریلی سے خطاب کرتے ہوئے سینڈرز نے کہا کہ امریکا ایک ایسے دور کی طرف بڑھ رہا ہے جسے وہ “تاریخ کی سب سے بڑی معاشی تبدیلی” قرار دیتے ہیں۔ ان کے مطابق اے آئی اور خودکار نظام (automation) ورکنگ کلاس کے لیے بڑے خطرات پیدا کر سکتے ہیں اگر ان پر مناسب ضابطے اور عوامی کنٹرول نہ ہو۔ سینڈرز نے خاص طور پر نوجوانوں کی ذہنی صحت اور سماجی تعلقات پر بھی تشویش ظاہر کی۔ ان کا کہنا تھا کہ “بچے دن بدن زیادہ تنہائی کا شکار ہو رہے ہیں” اور انہیں یہ خطرہ ہے کہ اگلی نسل کے لیے حقیقی انسانی تعلقات کی جگہ اے آئی چیٹ بوٹس نہ لے لیں۔ انہوں نے کہا کہ وہ نہیں چاہتے کہ مستقبل میں بچے انسانوں کے بجائے مشینوں کو اپنا دوست بنائیں، کیونکہ اس سے انسانی معاشرتی ڈھانچہ متاثر ہو سکتا ہے۔ تجزیہ کاروں کے مطابق سینڈرز کا یہ بیان امریکا میں اے آئی کے بڑھتے ہوئے اثرات اور اس پر جاری سیاسی بحث کو مزید تیز کر سکتا ہے، خاص طور پر اس تناظر میں کہ ٹیکنالوجی کمپنیوں کے بڑھتے ہوئے اثر و رسوخ پر پہلے ہی سوالات اٹھ رہے ہیں