بھارتی سکیورٹی ذرائع کے مطابق 2019 کے پُلوامہ حملے سے جڑے نیٹ ورک سے منسوب ایک اہم نام حمزہ برہان عرف “ڈاکٹر” پاکستان کے زیرِ انتظام کشمیر میں فائرنگ کے واقعے میں ہلاک ہو گئے ہیں۔ذرائع کے مطابق واقعہ مظفرآباد میں ایک تعلیمی ادارے کے قریب پیش آیا، جہاں نامعلوم حملہ آوروں نے اچانک فائرنگ کی اور موقع سے فرار ہو گئے۔حمزہ برہان شدید زخمی ہونے کے بعد موقع پر ہی دم توڑ گئے۔بھارتی حکام کا دعویٰ ہے کہ حمزہ برہان، جن کا اصل نام ارجومند گلزار ڈار بتایا جاتا ہے، مبینہ طور پر عسکری تنظیم “البدر” سے وابستہ تھے اور انہیں 2022 میں “نامزد دہشتگرد” قرار دیا گیا تھا۔تاہم پاکستانی ذرائع بھارتی مؤقف کو مسترد کرتے ہوئے کہتے ہیں کہ جس شخص کے مارے جانے پر بھارت خوشی منا رہا ہے، وہ دراصل ایک خاندانی جھگڑے میں مارا گیا ہے۔ان پر سرحد پار عسکری نیٹ ورکنگ، بھرتیوں اور پُلوامہ حملے سے منسلک سازش میں کردار کے الزامات عائد کیے جاتے رہے ہیں۔تاحال کسی گروہ نے حملے کی ذمہ داری قبول نہیں کی، جبکہ پاکستانی حکام کی جانب سے بھی فوری طور پر کوئی تفصیلی بیان جاری نہیں کیا گیا۔سکیورٹی ماہرین کے مطابق یہ واقعہ ایک ایسے وقت میں پیش آیا ہے جب جنوبی ایشیا پہلے ہی انتہائی حساس سکیورٹی ماحول سے گزر رہا ہے، اور ایسے واقعات خطے میں سیاسی و سفارتی تناؤ کو مزید بڑھا سکتے ہیں۔