ٹرمپ کو نیا فیڈ چیئرمین مل گیا، مگر ایران جنگ نے شرحِ سود میں کمی کا خواب خطرے میں ڈال دیا امریکی صدر ڈونلڈ ٹرمپ نے کیون وارش کو فیڈرل ریزرو کا نیا چیئرمین مقرر کر دیا ہے، تاہم عالمی بانڈ مارکیٹ نے ان کے لیے مشکلات کے نئے دروازے کھول دیے ہیں۔ ایران جنگ کے باعث عالمی سطح پر مہنگائی کے خدشات بڑھ رہے ہیں، جس کے نتیجے میں امریکی بانڈز کی ییلڈ تیزی سے اوپر جا رہی ہے اور شرحِ سود میں کمی کے امکانات معدوم ہوتے دکھائی دے رہے ہیں۔ رپورٹ کے مطابق 30 سالہ امریکی حکومتی بانڈز کی شرحِ منافع ایک موقع پر 2007 کے بعد بلند ترین سطح تک پہنچ گئی، جبکہ سرمایہ کار اور فیڈرل ریزرو کے کئی عہدیدار اب یہ امکان بھی زیر غور لا رہے ہیں کہ مہنگائی کو قابو میں رکھنے کے لیے سال کے اختتام سے پہلے شرحِ سود میں اضافہ کرنا پڑ سکتا ہے۔ معاشی ماہر ٹِم ڈوئے کا کہنا ہے کہ بانڈ مارکیٹ واضح پیغام دے رہی ہے کہ “شرحِ سود میں کمی کی کوئی گنجائش نہیں رہی۔” ایران جنگ کے باعث تیل کی قیمتوں اور عالمی سپلائی چین پر دباؤ نے مہنگائی کے خطرات کو مزید بڑھا دیا ہے۔ کیون وارش ایک ایسے وقت میں فیڈرل ریزرو کی سربراہی سنبھال رہے ہیں جب ایک طرف مارکیٹوں میں بے چینی بڑھ رہی ہے اور دوسری جانب وائٹ ہاؤس کی جانب سے شرحِ سود کم کرنے کا سیاسی دباؤ بھی موجود ہے۔ ڈونلڈ ٹرمپ اس سے قبل سابق فیڈ چیئرمین جیروم پاول کو مسلسل تنقید کا نشانہ بناتے رہے تھے کیونکہ وہ شرحِ سود کم کرنے پر آمادہ نہیں تھے۔ تجزیہ کاروں کے مطابق اگر ایران جنگ طول پکڑتی ہے اور توانائی کی قیمتیں مزید بڑھتی ہیں تو امریکی معیشت کو بیک وقت مہنگائی اور سست روی جیسے دوہرے خطرے کا سامنا ہو سکتا ہے، جس سے نئے فیڈ چیئرمین کے لیے پالیسی فیصلے مزید پیچیدہ ہو جائیں گے